2011-09-06

Máis da metade dos españois non desconecta do traballo en vacacións

Á maioría dos españois cústalles desconectar da súa actividade profesional durante as vacacións. O 62% asegura que se mantén conectado ao traballo no seu período de descanso, dos que o 44% recoñece consultar o seu correo electrónico a través do seu Blackberry ou da súa rede social profesional, segundo indica un estudo elaborado por Viadeo, unha rede social profesional cun millón de usuarios en España. Este informe revela que os franceses -os que tiveron que responder ás mesmas preguntas que os traballadores españois- mostran un nivel de desconexión maior que os residentes en España.

Portátiles, BlackBerry ou Smartphones, correo electrónico e redes sociais profesionais fan que os usuarios poidan manterse, se o desexan, ao tanto das novidades da súa empresa durante as súas vacacións. Unha oportunidade ao alcance da maioría e á que recorren máis da metade dos españois.

A principal conclusión do estudo de Viadeo é que case dous de cada tres enquisados, un 62%, seguen con certa asiduidade o que sucede no seu ámbito laboral durante as súas vacacións. Da porcentaxe anterior, catro de cada dez consulta "ás veces" o seu correo electrónico vía BlackBerry ou a través da súa rede social profesional e un 18% faino con asiduidade porque o seu xefe lle pide que permaneza conectado durante as vacacións.

No lado contrario, un 40% dos enquisados que aseguran que, durante os días libres, non mantén contacto co seu labor profesional aínda que non todos en igual medida: un 20% conéctase "moi pouco" e só está localizable en caso de emerxencia mentres que un 18% considera que as súas "vacacións son sagradas" e polo tanto "nunca" consulta o correo electrónico do traballo durante o seu tempo libre ou vacacional.

"Os dispositivos de alta tecnoloxía permiten agora aos empresarios e empregados con postos de alta responsabilidade irse de vacacións con total tranquilidade xa que saben que poden ter controlado o seu traballo cunha soa ollada", comenta o Partnership Manager e Responsable de Comunidades Profesionais en España, Pol Santacana.

Viadeo, que en todo o mundo ten máis de 35 millóns de usuarios, realizou o mesmo cuestionario sobre a conexión entre traballo e vacacións a empregados españois e franceses. Neste caso, os galos teñen unha maior capacidade de desconexión: un 44% dos enquisados, fronte ao 38% español, manteñen a conexión estritamente necesaria en vacacións.

Do lado dos que manteñen certa regularidade na súa conexión en época de descanso, os franceses que consultan regularmente o seu correo electrónico a través do seu BlackBerry ou da súa rede social supoñen un 35% fronte ao 44% de españois.

O país galo só supera a España á hora de acceder á petición dos xefes de permanecer conectado en vacacións. Un 21% dos franceses mantense operativo, fronte ao 18% en España.

Un estudo da Universidade Jaume I -elaborada durante o pasado ano- aseguraba que non desconectar da profesión durante as vacacións pode ser un indicador de que o empregado sofre adición ao traballo, unha patoloxía que produce problemas físicos e psíquicos.

Un de cada dez españois é adicto ao traballo, unha patoloxía en aumento e que provoca numerosos problemas físicos e psíquicos aos que a padecen. Lonxe de tratarse do empregado ideal para calquera empresa, psicólogos galegos alertan de que, co tempo, a produtividade destes traballadores é menor que a do resto dos seus compañeiros.

Un estudo da Universidade Jaume I, elaborado durante o pasado ano, indica que hai dúas claves para detectar os que son adictos ao seu emprego: traballan en exceso e de forma compulsiva. Dende o Colexio Oficial de Psicólogos de Galicia engaden outra: os adictos ao traballo non gozan coa súa actividade -algo que si acontece na maioría de adiccións-, pero a situación supéraos e non poden evitala. Para os expertos galegos esta é a gran diferenza entre un traballador implicado e un adicto. Un empregado a gusto coa súa profesión pode dedicalo máis horas de forma puntual á súa actividade, pero quen sofre unha adicción non o fai por gusto senón por necesidade, indican os psicólogos consultados.

Dende a Universidade Jaume I ofrécense ademais uns sinxelos cuestionarios para saber se alguén é adicto ou non ao traballo. Os que contesten que si a "sempre vou a contra o reloxo; levo varios asuntos á vez; síntome culpable cando teño un día libre ou séntome obrigado a traballar en exceso aínda cando non gozo da actividade" é probable que sufran esta patoloxía.

As consecuencias son física e psíquicas. Os adictos ao traballo poden sufrir cadros de ansiedade, ira, estrés así como patoloxías cardiovasculares, hipertensión, obesidade ou molestias gastrointestinais. Todo iso leva a que a produtividade sexa menor que a dos seus compañeiros aínda que eles estean menos horas no seu posto de traballo.

A solución pasa por unha terapia no especialista para aprender certas claves que aplicar á hora de afrontar o día a día no traballo.

23/08/2011 - A Opinión Coruña